لاہور (سپورٹس ڈٍیسک) پاکستانی آل رانڈر شاداب خان نے اپنی بالنگ کی مہارت کو بڑھانے اور ٹیسٹ ٹیم میں واپسی کے لیے 4 روزہ کرکٹ کو ترجیح دینے کے لیے اپنے بگ بیش لیگ (BBL) کے معاہدے سے الگ ہونے کا فیصلہ کیا ہے۔
ویب سائٹ ’کرکٹ پاکستان‘ کے ساتھ ایک خصوصی انٹرویو میں شاداب نے اس سال بگ بیش معاہدہ چھوڑنے کے اپنے فیصلے کی وضاحت کی۔شاداب خان نے کہا کہ بگ بیش معاہدہ چھوڑنے کا مقصد پہلے چار روزہ کرکٹ کھیل کر اپنی بالنگ کو بہتر بنانا ہے اور دوسرا اچھی کارکردگی دکھانا اور ٹیسٹ ٹیم میں واپسی کرنا ہے۔
25 سالہ نوجوان سپنر نے اپنی بالنگ میں بہتری کی ضرورت پر زور دیا اور ان کا ماننا ہے کہ کھیل کے طویل فارمیٹ میں حصہ لینے سے ان کی مجموعی مہارت کی نشوونما میں نمایاں مدد ملے گی۔انہوں نے مزید کہا کہ میں نے بگ بیش کا معاہدہ نیشنل ٹی ٹونٹی کھیلنے کی وجہ سے نہیں چھوڑا بلکہ میری توجہ چار روزہ کرکٹ کھیلنے پر زیادہ تھی کیونکہ میں نے محسوس کیا کہ مجھے اپنی بالنگ میں بہتری کی ضرورت ہے اور یہ چار روزہ کرکٹ کھیلنے سے ہی ہوگا۔
مزید برآں، شاداب خان نے خود کو بہتر بنانے کے لیے اپنی لگن کا بھی اظہار کیا اور وہ اپنی فارم دوبارہ حاصل کرنے اور قومی ٹیم میں موثر کردار ادا کرنے کے خواہاں ہیں۔شاداب خان نے وضاحت کرتے ہوئے کہا کہ ”میں نے چار روزہ کرکٹ کھیلنے اور اپنی بالنگ کو بہتر بنانے کے لیے خود پر سرمایہ کاری کرنے کی کوشش کی ہے۔
اگر میری بالنگ میں بہتری آتی ہے اور اس کے ساتھ ساتھ اگر میری بیٹنگ میں بھی بہتری آتی ہے تو یہ پاکستان ٹیم کے لیے فائدہ مند ہوگا۔” شاداب خان نے کہا کہ وہ چار روزہ کرکٹ کھیلنے کو اپنی صلاحیتوں میں سرمایہ کاری کے طور پر اور آنے والے ورلڈ کپ کے ساتھ اپنے اہداف کو ہم آہنگ کرنے کے لیے ایک اسٹریٹجک اقدام کے طور پر دیکھتے ہیں۔
کوشش ہے کہ چار روزہ کرکٹ کے ذریعے خود کو بہتر کروں اور اپنی فارم واپس لاوں کیونکہ ورلڈ کپ قریب آ رہا ہے، اور اگر میں اچھی فارم میں ہوں تو اس سے پاکستان کو فائدہ ہوگا”۔
